بصراحه من بعد اللي انا شوفته واللي بشوفه وهشوفه في بلدنا الغاليه دايماً مصر
لقيت مش سؤال ، لاء لا سمح الله ، انا لقيت كمية أسئلة مالهاش جواب
فقولت بدل ما اوجع دماغي ودماغكم ونسأل ايه المشاكل اللي بنواجهها كلنا في مصر ؟
بقا السؤال بعد التعديل : ايه المشاكل اللي ما بنواجهاش في مصر ؟
طبعاً السؤال الأولاني تحس انه كئيب نوعاً ما أو لا يتحمل صفة المرونة اللي اتعودنا عليها دايماً من حكومتنا اللذيذة
أما بقا السؤال التاني ، فأنا عن نفسي حسيت اني محتاج أبتسم ويمكن أضحك ، انما بصراحه الضحكه لو كانت بصوت عالي أبقا بالغت في رد فعلي ، وزي ما احنا عارفين ان الضحك من غير سبب قلة أدب
احنا عايشين دلوقت او داخلين دلوقت في منعطف تاريخي على رأي الفنان الكوميدي الجميل أحمد آدم صاحب الفكر والكاراكتر الهايل ، المهم عشان ما نسرحش بعيد عن موضوعنا ، ايه هو بقا المنعطف التاريخي ده ؟
انتخابات مجلس الشعب ومن بعدها انتخابات الرئاسة ، أظن مفيش مكان نتناقش فيه اجمل من مدونتنا الحزينه اللي هي مدونة الباكي طبعاً
وقبل ما أبدأ في تفاصيل موضوعنا ده ، يمكن كتير منكم مش عارف انا ليه سميت المدونة دي بالباكي ؟
إلا إن إسمها قد يوحي لأي واحد فينا ان من ورا الكلمة دي هدف ومعنى ، أنا بصرحه باكي على حالي وحالكم وحال شعبنا المصري البسيط الغلبان اللي كل همه لمقته وقوته بعيداً عن مسرح السياسة والانتخابات والاشتغالات اللي احنا عايشينها دي ليل نهار
نرجع تاني لموضوعنا وسامحوني لو كنت بخرج عن سياق الموضوع لكن أنا بصراحه جوايا كمية كلام رهيب عايزين نبقا نتكلم مع بعض فيه من وقت للتاني
انا شايف وبصراحه ومن غير كدب وبكل النوايا المخلصه الأمينه اللي جوايا ، ان الناس اللي ونازلة في شعارات خايبه ومايله بتوع مجلس الشعب دول ، أظن مفيش جديد : ولكن هناك مقولة لصديق لي وهو عزيز القدر بالنسبالي كان بيقولها حكمه ، قال : قمة الجديد انك تجيب اقدم حاجه
لكن مش معقول يكون الكلام الفاضي ده موجود في عندنا هنا في مصر في نظام الحكم بالذات وفي الناس اللي بتمثلنا احنا ، كشعب .
ايه ده ؟ .. هو موجود ؟ .. لا بجد ؟ يا نهار ابيض ؟ .. ده احنا ع كده ما بنتقدمش او ما تقدمناش خطوه واحده لقدام ؟ انتوا بتتكلموا بجد ؟
دي كانت شوية أسئلة ساذجة من شاب ساذج اتخرج من الجامعه وشايل على كتفه كيس فاكهه مشكل ، إشي أحلام وإشي خلفيات في الخيال مش موجوده على أمر الواقع ، الموضوع طلع كبير .
ان اء الله نكمل في المقال اللي بعد كده بس اهم حاجه ، خدوا بالكم من نفسكم وامشوا جوا الحيط الا لا قدر الله يكون حد بيتجسس علينا ولا حاجه تبقا مصيبه ، الجملة دي ما تطلعش من حد الا لو كان مصري صميم
جميع حقوق النشر محفوظة لمدونة الباكي
وعشان برضو اكون صريح معاكم ويتاخد شغلي بالادب وبرضايا بدل ما يكون غصب عني
اكتبوا تحت في اخر مواضيعي المصدر : مدونة الباكي
كده تبقوا عملتم معايا واجب زي الفل
يلا سلام
0 التعليقات:
إرسال تعليق