تعالوا كده نحاول نرجع للمقالة الاولانية اللي كتبناها النهارده برضو
ونكمل الكلام اللي واقف على اللسان ، بصراحه مصر فيها خير كتير جداً وماحدش يقدر ينكر ده ، انما لو جينا نبص على الخير مش هنحس بيه ، طبعاً علماء الحكومة المصرية ردوا في المسألة الحرجة دي وقالوا : احنا عددنا كبير شوف وصل لحد كام النهارده ( كام مليون يعني ) والخير موجود لكن مش ظاهر لفئات معينة نظراً لكثرة التعداد السكاني .
واللي مش هيحس بالخير النهارده اكيد هيحس بيه بكرا !
الكلام منطقي ويعدي من حاجز المسائلة أكيد ، لكن احنا بينا وبين بعض لما بنييجي نحسبها حسبه بالفلاحي كده بنقول ايه بقا .. هقولكم
بنقول هي مصر دي كام متر يعني ؟ يعني في الكام محافظه دول يا ترى كام فرن موجود وكام فسقية او جنينة ؟ وياترى عدد الموظفين بيلون ولا اقل شوية ولا اكتر شوية ؟
هو احنا بنعتمد على نظام اضرب اخوك وعور نفسك وقول هو اللي ضربك ؟ ولا ايه الكلام حد يفهمنا يا جدعان !!!
الكلام التقيل المتظبط في وسائل الإعلام بيخلي المواطن المصري يرد نفس الرد بتاع يونس شلبي في العيال كبرت لما كان احمد زكي بيتكلم وهو كان رده ظريف قوي ( إيوه والله يا جدع ) وقاعد يهز في راسه ، هو احنا مش ناويين نبطل نهز في راسنا ولا ايه ؟
على فكرة انا بشجع وبحب بعض او يمكن جزء من سياسة الحزب الحاكم وده شيء جميل جداً ويشجع على النمو الحضاري ، لكن المشكلة اللي انا حاسس بيها هي ان : ليه الأقرع نزهي ؟
في كل دول العالم بنلاقي موجود احياء شعبيه وبنلاقي موجود فيلل وقصور والدنيا ماشيه زي الفل ، لكن مش بالدرجة اللي احنا فيها دي ، ده يا راجل مفيش عندنا طبقى وسطى ، الطبقة الوسطى دي تعيش انت
دلوقت يا إما في العلالي يا إما كل سنه وانت طيب
أنا عن نفسي أول ما بصحا كل يوم من النوم بفتح عينيا على حاجات جميله جداً ، وبالمناسبة انا من الطبقة اللي هي كل سنة وانت طيب
وده مش عيب ولا حاجة انما الشيء لما بيزيد عن حده
بيتقلب ضده يا جماعه
ده اللي انا بتكلم فيه
خلاصة الكلام عشان ما حدش يفهمني غلط خلوني أهز راسي معاكم واقول ( إيوه والله يا جدع ) وربنا يجعل كلامنا خفيف عليهم
0 التعليقات:
إرسال تعليق